Главная » 2017 » Октябрь » 30 » Бүөтүр Тобуруокап 100 сааһыгар анаан…
14:30:53
Бүөтүр Тобуруокап 100 сааһыгар анаан…

Саха норуодунай поэта Петр Николаевич Тобуруокап быйылгы үбүлүөйдээх сылыгар анаан оскуолабыт бары саха кылаастарыгар аһаҕас уруоктар ыытылыннылар.
Бүөтүр Тобуруокап дьоһуннаах олоҕун, баай ис хоһоонноох айар үлэтин истиҥ, иһирэх сырдатыылар аҕыйаҕа суохтар. Онно кинини оҕо суруйааччыта, сатирик, юморист, ырыа буолбут хоһоонноро элбэҕинэн ырыталлар, ону сэргэ кэпсээн, остуоруйа, сэһэн суруйар прозаик, пьесалар ааптардара, публицист быһыытынан биллэр. Бүөтүр оҕо сылдьан норуот ырыаларын, сэһэннэрин сэргээн истэр, өйүгэр хатыыр эбит. Аны араас мындыр тэриллэри, оонньуурдары сиэдэрэйдик оҥорор дьоҕурдааҕа. Поэт балта ахтарынан, убайа « велосипед оҥорон соһутан турар, быһаҕынан кыһан. Хаптаһынтан көлүөһэлэри оҥорбут, араас талаҕынан педалларын, уруулун таҥмыт». Онон ытыктыыр суруйааччыбыт тылга эрэ буолбакка, аныгы үйэҕэ сөп түбэһэр техническэй толкуйдаах буолан тахсар.
П.Н.Тобуруокап айымньыларын тиэмэтэ киһи-аймах олоҕун тухары үрдүктүк тутар сыаннастарын таарыйар. Онон үүнэр көлүөнэни иитэр суолтата сүдү улахан. Төрөөбүт дойдутугар күүстээх таптала айар үлэтигэр толору көстөр, ону сэргэ кини Аҕа дойду улуу сэриитигэр бэйэтэ тылланан барбыта да элбэҕи этэр. Суруйааччы айымньыларын тыла-өһө оҕоҕо өйдөнүмтүө, хоһооннорун тутула тупсаҕайынан киһи өйүгэр түргэнник хатанар, онон кыралыын-улаханныын бары сөбүлээн ааҕар суруйааччыбыт буолар.
Бүөтүр Тобуруокап үбүлүөйүгэр аналлаах аһаҕас уруок устата оҕолор суруйааччы олоҕун, айар үлэтин билистилэр, айымньыларын ааҕан оҕо саастарын санаан кэллилэр. Суруйааччы көр-күлүү, сатирическай хоһооннорун хоһоонноохтук ааҕан, оруолларынан оонньоон көрдөрдүлэр. Поэт тус олоҕун, айар үлэтин билиигэ күрэхтэһэн ыйытыкка кытыннылар. П.Н.Тобуруокап “Күөрэгэйдиин көрсүһүү» диэн хоһоонунан ырыаны бары күргүөмүнэн ыллаан түмүктээтилэр.
Просмотров: 470 | Добавил: wrdz | Рейтинг: 0.0/0
Всего комментариев: 0
avatar