Главная » 2015 » Ноябрь » 10 » “Хотугу Хоһуун – 2015”
18:48:12
“Хотугу Хоһуун – 2015”

“Хотугу Хоһуун – 2015”

Муома орто оскуолатыгар уол оҕону иитиигэ кэлиҥҥи кэмҥэ улахан болҕомто ууруллар. Уол оҕо саха норуотун албан аатын ааттатар тутаах киhитэ, дьиэ кэргэнин араҥаччылыыр күүстээх санаалаах эр бэрдэ буолар.  Оннук санаанан салайтаран саха тылын уонна культуратын учууталларын методическай холбоhуга араас тэрээhини ыытар: «Уоланнар ыллыыллар», «Уол оҕо кус быhый, ат бөҕө», «Байанай күнэ», аҕалары кытта төгүрүк остуол, «Хотугу Хоhуун» уо.д.а.

Сэтинньи ыйа саха итэҕэлинэн Байанай ыйа буолар. Тыа иччитигэр анаан оскуолабыт 9-11 кылааhын уоланнарыгар «Хотугу Хоьуун» күрэҕэ бу ый 2 күнүгэр Муома үрэххэ ыытылынна. Оскуолабыт эр дьоно, салайааччылар уонна оҕолор буолан кыhыҥҥы айылҕаҕа тахсан балыктаан, күрэхтэhэн сынньаламмытын атаардыбыт. Тэрээhин сыала-соруга маннык: Баай Барыылаах Байанай – тыа иччитин өйдөбүлүн, булт  сиэрин-туомун арыйыы, уол оҕо эт-хаан өттүнэн кыаҕын, булчут буолар үөрүйэҕин сайыннарыы, өбүгэлэрбит үгэстэрин үйэтитии, күрэх көмөтүнэн уол оҕону айылҕаҕа сыһыарыы.

Тыаҕа тахсыбыт киhи сахалыы сиэринэн сирин-уотун аhатар үгэстээх. Аал уоппут иччитин «Аан айылҕа» пааркатын улэhитэ Захаров М.С. арыылаах алаадьынан айах тутта, уолаттар эбэбитин алгыстаах алаадьынан күндүлээтилэр. «Хотугу Хоhуун» күрэхпит 9 түhүмэҕинэн ыытылынна: бэйэни билиһиннэрии, ойбон алларыы, балыктааһын( бириэмэҕэ бастакы, улахан, кыра, элбэх балык), отуу итии чэйэ, булчут үгэстэрэ (өй күрэҕэ), сүгэһэрдээх тоҥуу хаарынан сүүрүү, ырааҕы быраҕыы, булчут мүччүргэннээх сырыылара (эстафета), хомуур хапсаҕай. Күрэх устата хас биирдии хамаандаҕа эр дьон салайааччылара анаммыттара, кинилэр субэлээн-амалаан уолаттарга көмө-тирэх буолбуттара. Уолаттар бары хамаанданан эрдэттэн түмсэн, туттар малларын тэринэн, таҥастарын-саптарын көрүнэн күрэххэ бэлэмнээх кэлбиттэрэ.

Күрэх түмүгүнэн үс хамаанда инники күөҥҥэ таҕыста. “Урааҥхай удьуордара” (10 “а”, 11 “а” кылаас уолаттара - салайааччы Громов А.А.) бастаата, “Хотугу уолаттар” (11 “б”- Бережнов М.М.) - иккис, “Байанай” (“9 “а” – Тарков М.А) – үhүс миэстэ буоллулар. Бары кыттааччылар туоһу сурук уонна анал бэлэх, Байанай бэлиэтин туттулар. “Мохсоҕол” (9 “б”, “в” – Кириллин Н.Д.) хамаанда уоланнара көхтөөх кыттыыларын иhин Муома национальнай пааркатын сурунаалын ыллылар. Бары түhүмэх түмүгүнэн Хотугу Хоhуун үрдүк аатын Слепцов Коля (10 “а”) сүкпүтэ. Бу күн эбэбит көмүс хатырыктааҕыттан Коляҕа эрэ бэрсэн, уол үөрүүтэ өссө үрдээтэ. Сибиэhэй салгыҥҥа сынньалаҥы туhалаахтык атааран оҕолор да, улахан да дьон астына тарҕаспыппыт. Уолаттар маннык тэрээhин сылын ахсын ыытылларыгар баҕа санааларын эттилэр.

Байанайга аналлаах күммүтүгэр сүрүн күүс-көмө, өйөбүл-тирэх буолбут «Аан айылҕа» пааркатын директорыгар Ефимов М., тутаах улэhиккэ Захаров М.С.-ка, ветеринарнай сулууспа сүрүн үлэhитигэр Терехова М.Д.–ка, Муома орто оскуолатын директорыгар Мартынов С.Н.-ка үтүө киhи үтүөтэ үс үйэ  умнуллубат диэн өс хоhоонунан сирэйдээн барҕа махталбытын тиэрдэбит.

Саха тылын уонна культуратын методическай холбоhуга.

Просмотров: 747 | Добавил: momasosh | Рейтинг: 5.0/1
Всего комментариев: 0
avatar