Главная » 2016 » Ноябрь » 4 » Хотугу Хоһуун – 2016
15:34:24
Хотугу Хоһуун – 2016

 

 

Саха итэҕэлинэн, сэтинньи ыйа хара тыа иччитэ Байанай ыйа буолар. Бу кэмҥэ Баай Барыылаах Байанай уол оҕону булдунан, балыгынан маанылыыр. Киһи айылҕалыын алтыһан, булт үгэстэрин тутуһан, үөрүйэҕэр сыстан олоххо эт-хаан өттүнэн бэлэмнээх буолар. Аан айылҕа абылаҥа уол оҕону чөл туруктуур, күүс-уох, эрчим эбэр.

Муома орто оскуолатын иһинэн ыытыллар «Хотугу Хоһуун» күрэх ити хайысханы тутуһан быйыл иккис төгүлүн ыытылынна. Сэтинньи 3 күнүгэр 8-11 кылаас чулуу уоланнара, оскуола уонна “Аан Айылгы» паарка үлэһиттэрэ Муома үрэххэ күргүөмүнэн үөрэ-көтө таҕыстыбыт. 

Сиэр-туом толорон эбэбитин алгыстаах алаадьынан күндүлээтибит. «Хотугу Хоhуун» күрэх сэттэ түhүмэҕинэн ыытылынна: бэйэни билиһиннэрии, ойбон алларыы, балыктааһын, сүгэһэрдээх тоҥуу хаарынан сүүрүү, ырааҕы быраҕыы, булчут мүччүргэннээх сырыылара (эстафета), хомуур хапсаҕай. Күрэх устата хас биирдии хамаандаҕа эр дьон салайааччылара анаммыттара, кинилэр сүбэлээн-амалаан уолаттарга көмө-тирэх буолбуттара. Уолаттар түөрт хамаанданан эрдэттэн түмсэн, туттар малларын тэринэн, таҥастарын-саптарын көрүнэн күрэххэ бэлэмнээх кэлбиттэрэ.

Оҕолор муус аннынан балыктаан, хамаандаҕа 1-5 балыгы аҕаллылар. Саамай элбэх көмүс хатырыктааҕы  Семенов Ньургустаан (11 “а») хаптарда уонна “Бастыҥ балыксыт» анал аатын сүгэн, балык киэргэллээх минньигэс торду бэлэх тутта. Бастакы балыгы хабан, аал уоту бэрт түргэнник оттон уонна дьүүллүүр сүбэ кэтээн көрүүтүн түмүгүнэн Хотугу Хоhуун урдук аатын Слепцов Артем (8 “а”) сүктэ. Булчукка туһалаах малы- тиэрмэһи- тутан  Артем уол үөрүүтэ өссө үрдээтэ. Ону таһынан уоланнарга анал аат иҥэрилиннэ: “Хорсун санаа” – Алексеев Павел (10а), «Инникигэ эрэл» - Слепцов Гавриил (8а), “Кыайыыга дьулуур” – “Оба-на” хамаанда (9абв – салайааччы Кириллин Н.Д.)). Күрэх түмүгүнэн үс хамаанда инники күөҥҥэ таҕыста. “Сиэгэннэр” ( 11 “а” кылаас уолаттара - салайааччы Громов А.А.) бастаата, “Урааҥхай” (10“аб”- салайааччылар Соркомов Г.К., Тогмитова А.В.) - иккис, “Хоту уолаттара” (8 “абв” – Слепцов Р.Е.) – үhүс миэстэ буоллулар. Бары кыттааччылар туоһу сурук уонна Муома пааркатын “Кытыл» хаһыатын бэлэх туттулар. Сибиэhэй салгынна сынньаланы туhалаахтык атааран оҕолор да, улахан да дьон астына тарҕаспыппыт.

Байанайга аналлаах күммүтүгэр сүрүн күүс-көмө буолбут «Аан айылгы» пааркатын директорыгар Иванов М.Н., Сивцев Г.С.-ка, Муома орто оскуолатын директорыгар Мартынов С.Н.-ка, кылаас салайааччыларыгар Старкова Е.С.-ҕа, Эверстова А.П.-ҕа, Николаева А.К.-ҕа, хамаандалар куратордарыгар үтүө киhи үтүөтэ үс үйэ тухары умнуллубат диэн өс хоhоонунан сирэйдээн муҥура суох барҕа махталбытын тиэрдэбит.  “Хотугу Хоһуун» күрэххэ улахан көмөнү оскуолабыт төрөппүтэ, ытыктанар аҕа, Муома пааркатын директора Иванов М.Н. оҥордо, сүрүн бириистэри бу тэрилтэ бэлэх уунна. Уол оҕо иитиитигэр олохтоох пааркабыт сүрүн болҕомтотун уурара аҕаларга чаҕылхай холобур буолар. Инникитин да Муомабыт аҕалара бары түмсэн уолаттарбытыгар өйөбүл-тирэх, сүбэ-ама буолалларыгар баҕарабыт.

 

 

 

 

 

 

Винокурова С.Е., Данилова Т.И.,

саха тылын уонна культуратын учууталлара

Просмотров: 500 | Добавил: gelyasolntse | Рейтинг: 0.0/0
Всего комментариев: 0
avatar