Главная » 2018 » Ноябрь » 9 » Хотугу Хоһуун – 2018
17:35:12
Хотугу Хоһуун – 2018

Байанай ыйыгар анаан күһүҥҥү сынньалаҥ кэмигэр үгэс буолбут “Хотугу Хоһуун” күрэх Муома орто оскуолатын иһинэн төрдүс төгүлүн ыытылынна. Күрэх сүрүн сыалынан -уол оҕо эт – хаан өттүнэн кыаҕын, булчут буолар үөрүйэҕин сайыннарыы, оҕону айылҕаҕа, сиэргэ-туомҥа сыһыарыы – буолар.

8-11 кылааһын уолаттара күрэххэ кыттаары, хоту дойду дьонун сиэринэн анаан-минээн оҥостон-тэринэн, сарсыарда 8.30 чаастан оскуолаҕа муһуннулар. Уопсайа 23 уол оҕо, 10 улахан киһи буолан, Муома үрэххэ (балансаҕа) сорох тимир көлөнөн, сорох сатыы хааман тиийдибит. Кыыдааннаах кыһын Тымныы оҕуһа сири-дойдуну үрүҥ тыынынан саба үрэн, дойдубут салгына ырааһыран, айылҕабыт хаар маҥан суорҕанынан бүрүнэн иһиллээбиттии иһийэн, чуумпуран көһүннэ.  Тулабыт барыта утуйбут курдуга. Ол эрээри хаар кыырпахтаах муус анныгар туспа олох баарын билэбит, эбэбит көмүс хатырыктааҕа биир кэм төттөрү-таары устан үгүс балыксыты умсугутар.

Кэлбит дьон бары аан айылҕабытыгар сүгүрүйэн, арыылаах алаадьынан күндүлээн,
Баай Байанай “мүчүк» гынарыгар көрдөстүбүт. Уолаттар балыктыыр, ойбон алларар тэриллэрин, тириилэрин кыбынан тус сыалларын тутуһан үрэххэ киирдилэр. Пилюченок Алеша (9в кылаас) бастакы балыгы уонна элбэҕи (10 балык) хаптаран уолаттар көхтөрүн күөдьүттэ, саамай улахан балыгы, дьарҕааны, Ильин Павел тутан үөрүүтэ үрдээбитэ, Сазонов Ян “Саамай кыра балык хаһаайына” буолла. Балыктааһын кэннэ уолаттар сылаас миин, отуу итии чэйин истилэр. Күүс-сэниэ киллэринэн баран тэрээһин түһүмэхтэринэн күрэхтэстилэр. Ол курдук, түһүмэх аайы кыайыылаахтар таҕыстылар: “Булчут мүлчүргэннээх сырыыта” эстафетаҕа, балыктааһыҥҥа, ойбон алларыыга, ырааҕы быраҕыыга, “Бэргэн ытааччы” сыал ытыыга – “Мохсоҕол” хамаанда иннин биэрбэтэ, бэйэни билиһиннэриигэ – “Айылҕа оҕолоро” бастаатылар. Күрэх түмүгүнэн бастакы миэстэни “Мохсоҕол” (9бв, 10а, 11а) уолаттара ыллылар, иккис – “Айылҕа оҕолоро” (9 а кылаас), үһүс – “Эрэл” (8б, 10 а).  Күрэх устата кэтээн көрүү түмүгүнэн уоланнары түмэр дьоҕурдаах, эт-хаан өттүнэн бэлэмнээх, тыаҕа, булка сыстаҕас туттуулаах үс эр хоһуун чорбойон таҕыста, ол Винокуров Мечислав (10”а”), Иванов Эрик (9 “а”), Слепцов Гавриил (10 «а»). Уолан киһи тыаҕа төһө бэлэмнээҕин көрдөрөн, кутаа уоту отуннулар. Ол түмүгэр кыайыылаах Винокуров Мечислав буолла уонна «Хотугу Хоһуун» үрдүк аатын сүктэ.

Хотугу Хоһуун уолаҥҥа уонна кыайыылаах үс хамаандаҕа Муоматааҕы “Аан Айылҕа” пааркатын дириэктэрэ Иванов М.Н. сыаналаах бириистэри туттарда. Бу  тэрилтэ хаһыс да сылын тэрээһиммитин өйүүрүгэр, күүс-көмө буоларыгар барҕа махталбытын тиэрдэбит. Муома орто оскуолатын салалтатыгар, көмө-тирэх буолбут бары учууталларга, кылаас салайааччыларыгар, төрөппүттэргэ махтанабыт. Чэгиэн, бөҕө туруктаах буолуҥ.  Мэлдьи ситиһии эрэ эҥэрдэстин, куруук дьол-соргу эрэ тосхойдун!

Саха тылын, литературатын, култууратын учууталларын түмсүүтэ

 

Просмотров: 167 | Добавил: wrdz | Рейтинг: 0.0/0
Всего комментариев: 0
avatar