Главная » 2018 » Март » 1 » Омук күүһэ – өйүгэр, өйүн күүһэ – тылыгар!
22:12:37
Омук күүһэ – өйүгэр, өйүн күүһэ – тылыгар!

Олунньу 13 күнэ, төрөөбүт тыл уонна сурук-бичик күнэ, өрөспүүбүлүкэ үрдүнэн бэлиэтэнэр. Муома орто оскуолатыгар бу күн оҕолор сахалыы таҥас, бэлиэ, киэргэл-симэх кэтэн, саха омугунан киэн тутталларын көрдөрдүлэр. Уруок тохтобулугар сахалыы ырыа ылланна, Федоров Эрэл (5 «а» кылаас) норуот суруйааччыта Күндэ “Төрөөбүт тыл» хоһоонун ааҕан иһитиннэрдэ. Остолобуой үлэһиттэрэ оҕолору арыылаах алаадьынан күндүлээтилэр. Саха тылын, литературатын уруоктара төрөөбүт тылбыт историятыгар, сайдыытыгар ананнылар. Эбиэт кэннэ улахан кылаас оҕолоругар санаа атастаһыылаах «Тыл оонньуута» ыытылынна. Бу күрэххэ оройуоннааҕы библиотека үлэһиттэрэ Старкова Л.А., Соркомова В.В. сүрүн күүс-көмө буоллулар. 
8 «б» кылаас оҕолоро төрөөбүт тыл туһунан санааларын үллэһиннилэр.
Черова Аурика: «Хайа да омук бэйэтэ туспа тыллаах буолан туспа омук аатырар. Тыла суох - омук суох. Төрөөбүт тыллаах киһи ийэ куттаах. Ийэ куттаах буоламмын, саха тылбынан киэн туттабын».
Семенов Эрчим: “Билигин төрөөбүт тылынан ыраастык саҥарар киһи аҕыйаабыт. Саха сиригэр араас омук элбээбит. Сорох сахалар бэйэлэрин тылларын сыаналаабакка, нууччалыы саҥараллар».
Гаибов Насим: “Билиҥҥи кыра оҕолор нууччалыы мультфильм көрөллөр, ол иһин нуучча тылын тутталлар. Ол түмүгэр төрөөбүт тылбыт сыппыыр. Мин санаабар, элбэх сахалыы телевизор канаалын таһаарыахха наада. Билигин үс эрэ сахалыы канаал көстөр: “НВК Саха”, “Якутия 24” уонна “Мамонт”.        
 Никулина Вика: “Олунньу 13 күнүгэр тыл оонньуутугар үс хамаанда кыттыбыта: «Кэнчээри», «Урааҥхай», «Дьулуур».  Олус үчүгэйдик ааста. Өссө да итинник тыл оонньуута сайда турдун». 
Васильева Айыына: “Күрэххэ кылааспытыттан биэс буолан кыттыбыппыт: Алина, Эрчим, Вика, Санаайа уонна мин. Бэрт үчүгэй, туһалаах оонньуу этэ. Биһиги суруйааччылары таайбыппыт, тыл суолтатын, сомоҕо домоҕу төһө билэрбитигэр куоталаспыппыт. Түмүккэ бастаан тахсыбыппыт. Хас биирдии Саха сиригэр олорор киһи саха тылын билиэхтээх».  
Муома орто оскуолата

 

Просмотров: 300 | Добавил: wrdz | Рейтинг: 0.0/0
Всего комментариев: 0
avatar