Главная » 2016 » Ноябрь » 18 » Саха норуотун улуу дьонун бэлиэ күннэрэ
18:29:18
Саха норуотун улуу дьонун бэлиэ күннэрэ

 

 

Быйыл саха литературатын улуу суруйааччыларын Амма Аччыгыйа, Күлүмнүүр, Суорун Омоллоон, Алампа үбүлүөйдээх сылларын өрөспүүбүлүкэ үрдүнэн бэлиэтээтибит. Муома орто оскуолатыгар Д.К.Сивцев – Суорун Омоллоон (110 сааһа) уонна А.И.Софронов – Алампа (130 сааһа) бэлиэ күннэригэр аналлаах литэрэтиирнэй биэчэр тэрилиннэ. Биэчэри Слепцов Коля (11а), Хабарова Дуся (10а) хомоҕой тылларынан иилээн-саҕалаан ыыттылар. Бу күн суруйааччылар олохторо, айар үлэлэрэ сырдатылынна, видеозапись көмөтүнэн Суорун Омоллоон ыччакка анаммыт кэс тыла иһилиннэ. 11а  кылаас үөрэнээччитэ Атласов Артем Алампа уобараһа буолан киирэн, “Үрүҥ туллук өрө мөлбөстүүр” диэн ыллаабыта ордук итэҕэтиилээхтик көһүннэ.  Д.К.Сивцев “Бэйэтэ эмтиэкэ” кэпсээнэ - 8 а кылаас, “Хараҥаҕа тыкпыт сырдык” кэпсээнэ – 6 аб кылаас, А.И.Софронов “Олох оонньуура” драмата – 10 а кылаас оҕолоро оонньоон көрдөрдүлэр, 7 аб кылаас уолаттара Алампа “Саха кэскилэ” хоһоонун дорҕоонноохтук аахтылар.

Улуустааҕы библиотека аатыттан Раднажапов В.Б. сүрүн оруолу оонньообут Слепцов Гавриилы уонна Алексеев Павелы бэлиэтээтэ, ону сэргэ саха тылын кабинетыгар кинигэ бэлэх уунна.

Саха норуотун суруйааччылара үөрэх сырдыгын, дьол өйдөбүлүн үүнэр көлүөнэҕэ айымньыларын көмөтүнэн арыйбыттарын оҕолор өйдөрүнэн-санааларынан ылыннылар.

Бу биэчэргэ сылдьыбыт оҕолор санаалара:

“Суорун Омоллоон 99 сааһыгар дылы олорбут уһун үйэлээх суруйааччы эбит. Кини олус интэриэһинэй кэпсээни айбыт, айымньыларын ааҕарбын бэйэм сөбүлүүбүн уонна суруйааччыга махтанабын. Бу литэрэтиирнэй биэчэргэ оҕолор сценкаларын көрөн сөбүлээтим, көрөөччүлэр бары да астынан тарҕастылар. Мин “Хараҥаҕа тыкпыт сырдык” диэн кэпсээни оҕолор оонньоон көрдөрбүттэрин интэриэһиргээтим. Биһиги кылааспытыттан Сазонов Ян кыттыбыта. Кини нуучча учуутала Болдьумаар буолбута. Үчүгэйдик оонньообутунан эҕэрдэлиибин. Д.К.Сивцев кэпсээннэрин өссө эбии ааҕарбыт буоллар үөрүөм этэ. Оҕолор, айымньылары ааҕыҥ”.

Слепцова Саргы, 6а кылаас

“Оҕолор бэйэлэрин оруолларын наһаа үчүгэйдик артыыстаан көрдөрбүттэрэ. Олус интэриэһинэй уонна күлүүлээх этэ. Мин эмиэ арыыйда улааттахпына үчүгэйдик артыыстаан көрдөрүөм”.

Гоголева Айна, 5а кылаас

“Биһиги оскуолабытыгар А.И.Софронов – Алампа уонна Д.К.Сивцев – Суорун Омоллоон суруйааччыларга аналлаах литературнай биэчэр буолан ааста. Онно мин саамай сөбүлээн көрбүт айымньым – “Хараҥаҕа тыкпыт сырдык”. Элбэх кыттааччы баара. Саамай үчүгэйдик артыыстаабыт оҕолор Алексеев Павел уонна Слепцов Гавриил буолбуттара”.

Вожжова Тоня, 5а кылаас

“Литературнай биэчэргэ биһиги кылаас оҕолоро “Хараҥаҕа тыкпыт сырдык” диэн кэпсээни оонньоон көрдөрбүттэрэ. Слепцов Кирилл – Ньукуус, Барашкова Света – ааптар, Ефимов Костя – Дьаакып, Вожжов Леонтий – баай учуутал, Айгыына, Сема, Виолетта уонна Айаан – оскуола оҕолорун оруолларын итэҕэтиилэхтик оонньообуттара. Бу биэчэргэ мин ордук сценкалары сөбүлээтим. Оҕолор бары наһаа үчүгэйдик артыыстаан оонньообуттара. Бары сахалыы таҥастаах этилэр. “Бэйэтэ эмтиэкэ” туруоруута эмиэ олус интэриэһинэй, күлүүлээх этэ. Маннык биэчэрдэр элбэхтэ буоллахтарына интэриэһинэй буолуо этэ. Хонуу дьоно көрүө этэ”.

Слепцова Илона, 6б кылаас

“Литературнай биэчэри олус сөбүлээтим. Мин санаабар, Слепцов Гавриил, Вожжов Леонтий уонна 6 б кылаас ордук артыыстаатылар”.

Атласова Зарина, 5б кылаас

“Мин саамай сөбүлээбит инсценировкам “Бэйэтэ эмтиэкэ”, 8 а кылаас туруорбута. Биэчэри Хабарова Дуся, Слепцов Коля ыыппыттара. Биһиги кабинеппытыгар улуустааҕы библиотека «Саха литературатын антологията” кинигэни бэлэхтээбитэ”.

Иванова Грета, 5 б кылаас

“Мин Суорун Омоллоон кэпсээнинэн “Бэйэтэ эмтиэкэ” инсценировканы ордук сэргээтим. Онно оҕонньор балыыһаҕа көрдөрүнэ тиийэн быраастан эмп ылар. Дьиэтигэр тиийэн анаммыт эми бэйэтэ эмтиэкэлээн, быраас суруйбутунааҕар элбэҕи иһэр. Онуоха ыарыыта бэргээн балыыһаҕа киирэр. Вожжов Леонтий оонньуурун сөбүлээтим”.

Слепцова Марианна, 5 б кылаас

“Хараҥаҕа тыкпыт сырдык” ис хоһоонун маннык өйдөөтүм: дьадаҥы уол үөрэниэн баҕарар, ол иһин аҕатын кытта оскуолаҕа бараллар. Онно баай учуутал уолу ылбат, ол оннугар нуучча учуутала үөрэнэ ыҥырар. Мин саамай “Бэйэтэ эмтиэкэ” диэн оҕолор толорууларын сөбүлээтим, бу айымньы бырааһы истэргэ, тугу эппитин толорорго уонна бэйэҥ санааҕынан эми испэт буоларга үөрэтэр”.

Варламова Айыллаана, 5 а кылаас

“Алампаҕа уонна Суорун Омоллооҥҥо анаммыт литературнай биэчэргэ оҕолор суруйааччылар айымньыларын сүрдээх үчүгэйдик, уобарастарыгар киирэн көрдөрдүлэр. Бу тэрээһин саха литературатын билиибитин дириҥэтэн интэриэһинэйдик ааспыта”.

Атласова Карина,10  а кылаас

“Бу күн оҕолор элбэх тылы үөрэтэн, оруолларыгар киирэн оонньоон көрдөрдүлэр. Айымньылар туруорууларын көрөн, олох туһунан элбэҕи билэҕин, өйдүүгүн, араас санааҕа киирэҕин. Учууталлар бу биэчэри тэрийэн ыыппыттарыгар улахан махтал”.

Жиркова Тома, 10 а кылаас

 

 

 

 

 

 

 

 

Винокурова С.Е., Данилова Т.И.,

саха тылын уонна культуратын учууталлара

Просмотров: 686 | Добавил: gelyasolntse | Рейтинг: 5.0/1
Всего комментариев: 0
avatar