Главная » 2017 » Ноябрь » 29 » Т.Е.Черемкин – Толомон 75 сааһыгар
16:08:12
Т.Е.Черемкин – Толомон 75 сааһыгар

Биһиги хотугу улууспут киэн туттар дьоһун киһитэ, суруйааччы, поэт, суруналыыс, артыыс, Муома орто оскуолатын айар талааннаах үөрэнээччитэ Тихон Егорович Черемкин – Толомон баара буоллар быйыл 75 сааһын туолбут буолуо этэ. Кини 1942 сыллаахха сэтинньи 11 күнүгэр Муома улууһугар Соболоох нэһилиэгэр күн сирин көрбүтэ. Кини дьоно Хоптолооххо олохсуйан олорор кэмнэригэр ахсыс оҕонон төрөөбүтэ. Кэтириинэ сэттэ оҕото өлөн соҕотох ордон хаалбыт уолун наһаа таптыыра. Тихон Хонууга үөрэнэ сырыттаҕына, олус ахтан көрсө кэлэрэ.
Уус-уран литературанан умсугуйуута 1958-60 сс. Муома оскуолатыгар олус көхтөөхтүк үлэлээбит “Үүнэр талаан» диэн литература куруһуогар дьарыктанартан саҕаламмыта. Соболооххо өр кэмҥэ учууталынан үлэлээбит М.А.Слепцова ахтарынан, “орто оскуолаҕа Хонууга үөрэнээччилэр литературнай куруһуоктарыгар староста этэ. Оскуолаҕа перемена быыһыгар куруһуокка бэриллибит сорудахтары хомуйан ылара. Тихон занятие аайы саҥаттан саҥа хоһооннору аҕалара, түргэн баҕайытык ис киирбэхтик суруйара... Концерка хоһоон ааҕара, араас пьесаларга, сценкаларга оонньуура. Кини оскуоланы бүтэрэн суруйааччы үөрэҕэр киириэ дии саныырбыт. ...Оннук үөрэх баар буолуохтааҕын курдук”.
Тихон Толомон кырдьаҕас ийэтин хаалларымаары, оскуола кэннэ салгыы үөрэммэтэҕэ. “Кыһыл чуумҥа”, “Индигир уоттара” хаһыат редакциятыгар, араадьыйаҕа үлэлээбитэ. Муоматааҕы норуодунай театрга артыыһынан оонньуура. Театр режиссерун Т.К.Апросимованы кытта айымньылаах үлэлэрин түмүгүнэн хас да ырыа суруллубута: «Саас кэллэ Муомаҕа», «Эдэр саас», «Тахсыахха “Ю” хайа үрдүгэр» о.д.а.
Т.Е.Черемкин хоһоонноругар Муома мелодистара элбэх ырыа суруйбуттара, хас да ырыа өрөспүүбүлүкэ үрдүнэн аатырбыта. Олортон “Ийэҕэ махтал», “Эйиэхэ”, “Уолчааммар” диэн бары билэр айымньыларбыт мелодиятын Степан Васильев айбыта. Кини Толомон үбүлүөйүгэр ыҥырыылаах ыалдьыт буолан ырыа кэһиилээх кэлэн барда.
Сэтинньигэ Тихон Толомон төрөөбүтэ 75 сааһын бэлиэтиир араас тэрээһин оройуон үрдүнэн ыытылынна. Ол курдук, оҕолорго анаан уруһуй күрэҕэ, поэт айымньыларынан научнай-практическай конференция, литэрэтиирнэй көстүүнэй, хоһооннорун ааҕыыга күрэх, кинигэ презентацията, Толомон төрүччүтэ о.д.а элбэх интэриэһинэй тэрээһин буолбута. Муома орто оскуолата барытыгар көхтөөх кыттыыны ылла. Уруһуйга Жиркова Тома (11а), Онопрова Айгылаана (5а), Иванов Егор (9а), Атласова Карина (11а),Ефимова Ванесса (9в) миэстэлэспиттэрэ, хоһоон тылбааһыгар Ильин Павел (8а), Калугина Алина (10а) призер буолбуттара. Оскуолаттан 32 оҕо рецензията «Ситим» кинигэҕэ (ред А.С.Хабарова-Владимирова) бэчээттэннэ. И.П.Хабаров оҥорбут Толомон төрүччүтүгэр 112 аймах оҕо хабыллыбыт, бары түөстэригэр иилинэр значоктары ылбыттара. Онон быйыл киэн туттар суруйааччыбыт Т.Е.Черемкин-Толомон үбүлүөйэ киэн далааһыннаахтык бэлиэтэннэ.

Атласова Карина, Хабарова Евдокия 11 «а» кылаас
Просмотров: 333 | Добавил: wrdz | Рейтинг: 0.0/0
Всего комментариев: 0
avatar