Главная » 2018 » Ноябрь » 9 » Тымтык саас – 2018
17:30:39
Тымтык саас – 2018

Алтынньы ыйыгар Муома орто оскуолатыгар  «Тымтык саас» диэн 13 саастарын быйыл туолар оҕолорго сиэр-туом ыытылынна. Бу тэрээhин сыала-соруга: оҕо төрүт культуратын билиитэ, омук быhыытынан киэн туттуута, сахалыы сиэр-майгы өттунэн сайдыыта. 13-15 сааһы хабар кэм “Тымтык саас” диэн ааттанар. Бу сааһыгар оҕо төрүт култууратын сүрүн өттүн билэр, ылыммыт ис хоһоонун толору өйдүүр буолар. Уол оҕо эр киhи ис-тас улэтин толору улэлэhэр, булка-алка, окко-маска тэҥҥэ сылдьыhар, оттомурар, толкуйдуура олоҕурар. Кыыс оҕо кыыс быhыыланар, кэмчиэрийэрэ, кыбыстанньаҥа-сэмэйэ киирэр. Ийэтин кытта астаһар, таҥаһы-сабы тиксэр, барыны-бары сатыыр буолар.

Туомҥа мустубут бары оҕолору алгыска кыттыстыннар диэн оскуола төрүт культуратын учуутала Винокурова С.Е., төрөөбүт тыл уонна литература учуутала Данилова Т.И. боҕуруускай отунан уонна чуорааннаах үрүҥ сылгы дэйбииринэн ыраастаатылар. Ол кэннэ олохтоох алгысчыт аал уоту оттон, Слепцов В.Г. үтүө тыллаах алгыс тылын кэлбит дьоҥҥо анаата. Алгыс тылын кэннэ тэс бэрсии туома ыытылынна. Онтон төрөппүттэр харысхал бэлиэни уолаттарга кэтэттилэр, хобо чуорааны кыргыттарга бэлэх ууннулар. Бу күн оҕоҕо 13 кэрдиистээх тымтыгы туттарар үгэс баар.  Тымтык  суолтата - туох эмэ бэлиэ тугэҥҥэ ууруна сылдьан эбэтэр туох эмэ ыра санааны санаан баран уматтахха ол ыра туолар диэн. Бу күн оҕо барыта тымтык тутан үөрүүлэрэ үрдээтэ. Тэрээһин сахалыы амтаннаах астаах мааны остуолунан, өбүгэбит оонньуутунан түмүктэннэ.

 

Просмотров: 145 | Добавил: wrdz | Рейтинг: 0.0/0
Всего комментариев: 0
avatar