Главная » 2016 » Июнь » 2 » Уруйданнын самаан сайын!
17:00:11
Уруйданнын самаан сайын!

Ыам ыйын 28 күнүгэр Муома орто оскуолатыгар аан бастаан «Уруйданнын самаан сайын!” диэн оройуоммут тэриллибитэ 85 сылыгар аналлаах ыьыах ыытылынна. Сарсыардаттан оҕолор төрөппүттэрин уонна учууталларын кытта ыһыах түһүлгэтигэр сахалыы таҥастаах, астаах-үөллээх муһуннулар. Айылҕабыт анаабытын курдук ыраас халлааннаах күн туран биэрдэ. Ыһыах сиэринэн түптэ сытынан арчыланыы, ыраастаныы, аал уот иччитигэр сүгүрүйүү сиэрэ-туома толорулунна. Олохтоох ытык-мааны алгысчыппыт Слепцов В.Г. арыалдьыт оҕолору кытта Аан Ухханы айах тутан алгыс тылын тиэртэ. Ол кэннэ кырыымпалыыр куоластаах кыталык кыргыттар кэрэ үҥкүүлэринэн түһүлгэни киэргэттилэр, оһуокайдьыттар үҥкүүлээн тэйдилэр, сытыы тыллаах чабырҕахсыттар чуопчаардылар, чуор куоластаах кэрэ куолар дэгэрэҥ ырыаларын ыллаатылар. Оскуола директора Мартынов С.Н., директоры солбуйааччы Терешкина А.И. үөрэхтэрин ситиһиилээхтик бүтэрбит оҕолору грамотанан бэлиэтээтилэр, учууталларга махтал суруктары туттардылар, төрөппүт комитетын бэрэссэдээтэлэ Архипова С.А. сыл түмүгүнэн «Чулуу кылаас” бэлиэтин, харчынан бириэмийэни туттарда.

Бу күн сахалыы оонньуулар, күрэхтэр уолаттарга, кыргыттарга ыытылынна. «Өбүгэ оонньууларыгар» 5 көрүҥҥэ: көтөх ынаҕы туруоруу, оҕус уонна чөҥөчөк, тутум эргиирэ, хороҥ оту ыстаныы, куобахтааһын -  17 уолан көхтөөхтүк кытынна. Күрэх түмүгүнэн үс бөлөҕүнэн Хабаров Сергей (5б), Слепцов Гавриил (7б), Алексеев Игорь (11а) кыайыылаах үрдүк аатын сүктүлэр, Слепцов Эрсан (6в), Терешкин Стас(8в), Ефремов Костя (11Б), Семенов Эрчим (6б), Варламов Саша (8б), Нучеканов Слава (9в) иккис, үһүс миэстэлэргэ тигистилэр уонна бары добун сурук, харчынан бириэмийэ тутан үөрүүлэрэ үксээтэ. Былчыҥ быыппастар харсыһыылаах хапсаҕай күрэҕэр муҥутуур кыайыылааҕынан буоллулар: Слепцов Кеша (6б), Варламов Саша (8б), Терешкин Юра (11б). Үгүс киһи болҕомтотун тардар мас тардыһыытыгар кыайыы өрөгөйүн өрө туттулар: Слепцов Эрсан (6в), Мярикянов Андрей (7в), Слепцов Ян (8а). Бу икки көрүҥҥэ дьоһун сыаналаах бириистэри олохтоох урбаанньыт Фазульянова С.С. анаата. Уһун суһуохтаах кыргыттарга анаан «Долгууна Куо» ыытылынна, манна 20  кыыс 4 түһүмэҕинэн (саха таҥаһа, кус үргээһинэ, чороонноох сүүрүү, суһуох уһунун кээмэйэ) кыттыыны ылла. Үс бөлөҕүнэн бастакы миэстэҕэ Винокурова Айгыына (5б), ДягилеваВика(6а), Слепцова Алена (8а) таҕыстылар, иккис, үһүс миэстэҕэ Сокорутова Виола (5в), Захарова Санаайа (6а), Новгородова Настя (7а), Старкова Света (10б), Слепцова Саргы (5а), Слепцова Айнура (6а), Оконешникова Виола (8б) Кэрэ Куолар тигистилэр. Кыайыылаахтарга оскуола уонна урбаанньыт Карпова Н.Н. бэлэхтэрэ туттарылыннылар. Долгууна Куо үрдүк аатын саамай уһун суһуохтаах (10 тутум, 3 тарбах) 8а кылаас үөрэнээччитэ Слепцова Алена сүктэ. Кини төрөппүт комитетын анал бирииһин, сахалыы бастыҥаны, кэтэн киэркэйдэ. Ыһыахпыт дуорааннаах оһуокайынан түмүктэннэ. Бастыҥ оьуокайдьыт аатын Макарова Алина (6б), Ильин Павел (6а), Неустроева Диана (7б), Семенов Эрчим (6б), Новгородова Настя  (7а), Новгородова Валерия (7а) ыллылар уонна саха тылын, культуратын учууталларын түмсүүтүн бириэмийэтин туттулар.

Үөрэх дьылын түмүктүүр ыһыаҕын төһүү дьоммут Мартынов С.Н., Тихонова В.В., Аммосов В.В., Архипов Ф.Н, саха тылын, культуратын учууталлара Винокурова С.Е., Данилова Т.И., Николаева А.К. тэрийэн ыыттылар. Күүс-көмө буолбут биир идэлээхтэрбитигэр, кылаас салайааччыларыгар уонна төрөппүттэргэ, чуолаан, Слепцова А.М.-ҕа, Тарабукина Л.И.-ҕа, Старкова М.А-ҕа, Ефимова А.П.-ҕа, Архипова С.А.-ҕа, алгысчыппытыгар Слепцов В.Г.-ка, оскуола уонна остолобуой үлэһиттэригэр  барҕа махталбытын тиэрдэбит. Оҕо сайдарын туһугар өрүү кыһамньытын уурар Фазульянова С.С.-ҕа, Карпова Н.Н.-ҕа, төрөппүт комитетыгар истиҥник махтанабыт. Барыгытыгар дьолу-саргыны, уйгулаах олоҕу баҕарабыт.

 

 

Муома орто оскуолата

 

 

 

Просмотров: 657 | Добавил: gelyasolntse | Рейтинг: 5.0/1
Всего комментариев: 0
avatar