Главная » 2015 » Декабрь » 1 » VI районный фестиваль-конкурс "Синяя птица"
01:08:19
VI районный фестиваль-конкурс "Синяя птица"
«Синяя птица» күрэс таһыма үрдүүр

Сэтинньи 26-29 күннэригэр Хонуу сэлиэнньэтигэр оройуоннааҕы «Осикат» этно-культурнай кииҥҥэ «Синяя птица» диэн уус-уран айар талааннаах оҕолор күрэстэрэ буолан ааста. Бу фестиваль - конкуруhу Муома орто оскуолатын коллектива тэрийэн ыытта (сал. С.Н. Мартынов). Манна Хонуу, Суон Тиит, Буор Сыһыы, Улахан Чыыстай, Соболоох, Чыбааҕылаах оҕолоро кэлэн көхтөөхтүк кытыннылар. Бастакы үс күн оҕолор саастарынан күрэхтэстилэр. Ол курдук сэтинньи 26 күнүгэр оскуолаҕа киириэхтэрин иннинээҕи саастаах оҕолор куоталастылар. Кырачаан оҕолор «Синяя птица» күрэскэ бу аан бастаан кыттыылара буолар. Кинилэр кэннилэриттэн салгыы сэтинньи 27 күнүгэр ырыа-үҥкүү түһүлгэтигэр 1-5 кылаас үөрэнээччилэрэ таҕыстылар. Оттон сэтинньи 28 күнүгэр 6-11 кылаастар күөн көрүстүлэр. Оҕолор икки сүрүн жанрга ― ырыаҕа уонна үҥкүүгэ күрэс былдьастылар. Итини таһынан фольклорга, театральнайга, о.д.а жанрдарга кииристилэр. «Синяя птица» куоҥкурус лоп курдук 10 сыллааҕыта төрүттэммитэ. 2005 сыл ахсынньы 1 күнүгэр Москваҕа эдэр талааннар бастакы Бүтүн Россиятааҕы куоҥкурустара ыытыллыбыта. Бу куоҥкуруһу тута Россия бары регионнарыгар тэрийэн барбыттара. Ити курдук бу күрэс биһиги оройуоммутугар эмиэ тиийэн кэлбитэ. Бастакы «Синяя птица» Муомаҕа 2010 сыллаахха тэриллибитэ. Дьэ онон быйыл «Синяя птица» күрэс алтыс төгүлүн ыытылынна. Быйылгы «Синяя птица» куоҥкуруһу Муома оройуонун баһылыгын солбуйааччы Х.П. Кривошапкина, Муома национальнай нэһилиэгин баһылыга А.В. Андреев, Муома орто оскуолатын салайааччыта С.Н. Мартынов кэс тылларынан астылар, кыттааччыларга ситиһиини баҕардылар. Сылтан сыл көрдөххө, куоҥкурус таһыма үрдээн иһэр: оҕолор толорор маастарыстыбалара, сценическэй көстүүмнэрэ, уус-уран салайааччылар үөрэтэр, уһуйар ньымалара, о.д.а. тупсар, уларыйар, сайдар. Оҕолор репетуардара киэҥ. Норуот ырыаларыттан, үҥкүүлэриттэн саҕалаан омук ырыатыгар, үҥкүүтүгэр тиийэ толордулар. Саха ырыатын дьиэрэттилэр, эвен сээдьэтин эттилэр, нуучча ырыатын унаарыттылар. Хомуска оонньоон дьүрүһүттүлэр. Итини таһынан араас омуктар үҥкүүлэрин үҥкүүлээтилэр: эвеннии, сахалыы, нууччалыы, грузинныы, испанскайдыы, индиялыы, алтайдыы, аныгы, хотугу, о.д.а. Спортивнай үҥкүүлэри, художественнай гимнастиканы көрдөрдүлэр. Олохтоох автордар Анатолий Старков “Маҥан хаар”, Андрей Старков «Көрбүтүм эйигин ыһыахха», Василий Слепцов «Күндү ийэбэр» ырыаларын көрөөччүлэр биһирии иһиттилэр. Оҕолор толорууларын Дьокуускай куораттан кэлэ сылдьар культура үлэһиттэрин Российскай айар союзтарын Саха сиринээҕи отделениетын толорооччу директора, Культура уонна искусство колледжын преподавателэ, СР эдэр ыччат политикатыгар туйгуна А.Е. Черноградскай председателлээх дьүүллүүр сүбэ сыаналаата. Жюри састаабыгар киирдилэр: Дьокуускайдааҕы “Туймаада” ырыа ансамблын солиһа, Муома көмүс куолаһа Н.Н. Роббек, «Осикат» этно-культурнай киин директора, СР культуратын туйгуна Б.И. Заровняев, «Синяя птица» ырыаҕа 2014 сыллааҕы гран-притин хаһаайына, Муома орто оскуолатын 9 кылааһын үөрэнээччитэ А. Хохолов уонна «Индигир уоттара» хаһыат корреспондена Т.И. Слепцова. Сэтинньи 29 күнүгэр «Осикат» этно-культурнай кииҥҥэ үгүс киһи муһунна. Бу күн «Синяя птица» куоҥкурус саамай бастыҥ нүөмэрдэриттэн талыллыбыт Гала-концерт буолла. Үс күн устата сотовай сибээс көмөтүнэн көрөөччүлэргэ анаан ыытыллыбыт «Көрөөччүлэр биһирэбиллэрэ» түһүмэх түмүгэ таҕыста. Дьэ ол курдук Синяя птица» күрэс саамай бочуоттаах бирииһин гран-прини ыллылар: ырыаҕа ― Сайаана Слепцова («Девочка-снегурочка» ырыатын иһин, «Сказка» д/с), «Сибэкки» кыргыттар ансабллара («Оҕо саас» ырыа, Индигир), трио Сардаана Старкова, Айыына Слепцова, Маша Слепцова («Сахам сирэ», искусство оскуолата), үҥкүүгэ ― «Кэскил» д/с үҥкүүһүттэрэ ( «Ыһыахха» үҥкүү), «Кыымчаана» үҥкүү ансамбла (хотугу үҥкүү, Индигир), искусство оскуолатын Улахан Чыыстайдааҕы филиалын үҥкүүһүттэрин бөлөҕө («Духи моря», Улахан Чыыстай), фольклорга ― хомусчуттар ансамбллара («Дыхание Севера» дьүһүйүү), Күннэй Ефимова (норуот ырыата, Хонуу). Араас номинацияҕа тигистилэр: «Теремок» детсад иитээччилэрэ (фокус), Сайыына Тарабукина (Умсуур удаҕан оруолун иһин, «Сказка» д/с), Яша Соломатин («Почемучка» ырыа, Муома начальнай оскуолата), Сахамин Ильин, Кирилл Слепцов (норуот ырыата, Муома орто оскуолата), кыргыттар квинтеттэрэ («Ийэ таптала» ырыа), Артем Атласов (Айыы Уолун репертуарыттан ырыа). Гран-прини ылбыт оҕолор уонна коллективтар музыкальнай центринэн наҕараадаланнылар. Бастакы степеннээх лауреаттар: ырыаҕа ― уолаттар ансамбллара («Три пингвина» ырыа, «Кэнчээри» д/с), Муома начальнай оскуолатын 2 «а» кыл. үөрэнээччилэрэ («Ийэ күнэ» ырыа), Данил Атласов (Анатолий Старков репертуарыттан «Маҥан хаар» ырыа, Индигир), үҥкүүгэ ― «Осикат» д/с үҥкүүһүттэрэ («Озорные мышата» үҥкүү, Улахан Чыыстай), эдэр гимнасткалар бөлөхтөрө («Акробатика», Индигир), Соболоох оскуолатын үҥкүүһүттэрин бөлөҕө («Оһуор» үҥкүү). Иккис степеннээх лауреаттар: ырыаҕа ― «Күнчээн» д/с уолаттара («Кулунчук», Индигир), Айдын Атласов («Чуораанчык» эвеннии ырыа, Индигир), Уруйдаана Старкова, Вася Аммосов («Таптал ырыата», Орто Дойду), үҥкүүгэ ― «Осикат» д/с үҥкүүһүттэрэ (дүҥүрдээх үҥкүү, Улахан Чыыстай), Марфа Слепцова, Жора Уваровскай (хотугу үҥкүү, Соболоох), оҕо айар дьиэтин кыргыттара («Кыталык» үҥкүү, Хонуу), «Туундара үөрүүтэ» ансамбль (саха үҥкүүтэ, Хонуу), фольклорга ― Настя Мартынова (хомуска илии араас охсуулара), “Дэгэрэҥ” ансамбль (Муома орто оскуолата. ҮҺүс степеннээх лауреаттар: ырыаҕа ― Эйнара Таркова( ырыа, «Кэнчээри» д/с), Анжелика, Жанна Фазульяновалар (искусство оскуолата, Хонуу), Индигир уолаттара («Московский бит» ырыа), үҥкүүгэ ― “Теремок” д/с үҥкүүһүттэрин бөлөҕө (“Булчуттар” үҥкүү), Дуся Хабарова, Игорь Алексеев (“Пробуждение”, искусство оскуолата),. Дипломаннарынан буоллулар: 1 степень ― «Кэскил» д/с уолаттара ( “Мин булчуппун” ырыа, Суон Тиит), уолаттар ансамбллара (“Супермен”, Орто Дойду), Проня Скрыбыкин («Ырыабар үөрүүнү туойабын» ырыа, Индигир), искусство оскуолатын үҥкүүһүттэрэ («Тарантелла», Хонуу), 2 ст. ― Данил Корнилов («Гномики» ырыа, Муома начальнай оскуолата), Люда Симонова («Потанцуем, Джек» ырыа), 3 ст. ― Айлаана Слепцова («Сэбирдэх», Индигир), кыргыттар триолара («Хотугу дойдум», Орто Дойду). Күрэс түмүгүнэн бастыҥ уус-уран салайааччы аатын хореограф Нина Геннадьевна Соркомова (Улахан Чыыстай) ылла. «Синяя птица» тэрийээччитэ Василий Аммосов туруорбут Кубогынан Данил Атласов наҕараадаланна. Бастыҥ айар үлэлээх оскуоланан Н.А. Брызгалов аатынан Индигир орто агрооскуолата ааттанна (директор С.А. Сергеева, уус-уран салайааччы, СР культуратын туйгуна В.В. Слепцов). Ураты бириис көмөтүн, сүбэтин иһин «Осикат» этно-культурнай киин директора Б.И. Заровняевка туттарылынна. «Оҕо айар дьоҕурун сайыннарыыга кылаатын иһин» наҕарааданы Муома начальнай оскуолатын учуутала Л.Н. Федорова тутта. Быйылгы «Синяя птица» рекорду олохтоото. Ол курдук сотовай телефонунан «Көрөөччүлэр биһирэбиллэрэ» куоластааһыҥҥа 4563 киһи кытынна. Көрөөччүлэр биһирэбиллэрин ылбыт нүөмэрдэр ― «Озорные мышата» («Осикат» д/с, Улахан Чыыстай), «Барбарики» (Муома начальнай оскуолата, Хонуу), «Индийскэй үҥкүү» (искусство оскуолатын Улахан Чыыстайдааҕы филиала). Дьүүллүүр сүбэ бары чилиэннэрэ быйылгы күрэс таһыма таһыччы үрдүгүн бэлиэтээтилэр. Оттон жюри председателэ, Культура колледжын предодавателэ Айдыс Егорович Черноградскай бу курдук эттэ: «Мин Муомаҕа бу аан бастаан кэлиим. Оҕо музыкальнай куоҥкуруһа элбэх, ол эрээри маннык киэҥ далааһыннаах, үрдүк таһымнаах күрэскэ аан бастаан сырыттым. Соһуйдум. Үс күн устата 40-нуу нүөмэри көрдүбүт. Оҕолор олус бэрээдэктээх эбиттэр, дорооболорун туппутунан сылдьаллар. Уус-уран коллективтар салайааччылара олус күүстээх эбиттэр. Үҥкүү коллективтарыттан Улахан Чыыстай бөлөҕүн биһирээтим. Бэртээхэй үҥкүүлэри бэлэмнээн аҕалбыттар. Ырыаҕа Индигир нэһилиэгиттэн Василий Васильевич Слепцов бэлэмнээбит ырыаларын сөбүлээтим». Дьүүллүүр сүбэ уус-уран салайааччылартан Н.Г. Соркомова (Улахан Чыыстай), В.В. Слепцов (Индигир), кэргэннии Скоробогачтар, М.А. Старкова, А.И. Кравцов, С.В. Неустроева, А.А. Егоров (Хонуу), М.А. Афанасьева (Соболоох), о.д.а. үлэлэрин үрдүктүк сыаналаата. Куоҥкуруһу тэрийээччи, СР эдэр ыччат политикатыгар туйгуна В.В. Аммосов иилээн-саҕалаан ыытта. Киниэхэ «Осикат» этно-культурнай киинтэн Алексей Варламов, Афанасий Слепцов уонна Муома орто оскуолатын учууталлара Анна Слепцова, Елена Неустроева, Андрей Громов, Алена Тогмитова көмөлөстүлэр. Эһиил көрсүөххэ диэри, «Синяя птица»!

Просмотров: 660 | Добавил: momasosh | Рейтинг: 0.0/0
Всего комментариев: 0
avatar